INT / ART

Sintî locâl – Agjî globâl

Storiis di zovins artiscj furlans
tra l’amôr pe art e la identitât culturâl e linguistiche

arlef180

Progjet finanziât de ARLeF – Agjenzie Regjonâl pe Lenghe Furlane

PROGJET DOCUMENTARI IN SERIIS 15 x 13′

logo-Fondo-180
logo_regione_fvg-190

PROGJET

Jessi zovins, jessi artiscj, jessi furlans, frisons, galês,…

Identitâts individuâls e coletivis, une lenghe minoritarie tant che simbul di apartignince a une comunitât, cetant piçule, te onivare globalizazion planetarie.

INT (par furlan), ART (par furlan): vâl a dî int che si dediche ae art. Ma ancje INTernational/ARTist.

Culì e a vuê, a son in vore zovins musiciscj, ilustradôrs, regjiscj, atôrs, balarins, fotografs e tancj altris protagoniscj de creativitât che si esprimin intune lenghe minoritarie.

INT/ART al conte lis lôr storiis intune produzion televisive inedite: locâl pe lenghe doprade, internazionâl par puartade divulgative.

INT/ART al vûl inviulâ une riflession su la influence e la part che a àn la identitât linguistiche e culturâl pai zovins creatîfs intes diferentis dissiplinis artistichis.

MODEL DI PRODUZION

Il progjet al è fat di trê seriis par un totâl di 15 documentaris monografics curts di 13′ dal un.
Formât: HD.
Lenghe origjinâl: furlan; sottitui: talian e inglês.

SOGJET

Il lavôr si presente tant che un puzzle di riflessions, pinsîrs e confessions dal protagonist indreçâts a un probabil scoltadôr fûr cjamp. In maniere simboliche lis ambientazions a rivuardin i lûcs plui significatîfs.

Il protagonist al conte di se: la sô infanzie e il rapuart cu la lenghe mari, cemût che e je nassude la passion pe art, la relazion tra il so interès artistic e chel dai familiârs.

Planc a planc o scuvierzìn il contest sociâl e culturâl dulà che al è cressût e cemût che la passion si è trasformade in profession.

Lu viodìn te sô vite di ogni dì, a contat cun familiârs, amîs, coleghis. Tocs di dialics che nus dan rispuestis implicitis a cualchi domande: trop isal complès esprimi la creativitât intune lenghe minoritarie? Cemût vegnino acetadis lis oparis dal public locâl? E fûr de sô tiere? La lenghe daie une sensibilitât diferente rispiet a chei altris artiscj? Cemût si compagnino lis lidrîs culturâls cu la necessitât di contaminazion e inovazion? Cualis sono lis prospetivis pal avignî?

PROTAGONISCJ

Prime serie – Musiche

I protagoniscj de prime serie a son i musiciscj des ultimis gjenerazions. La sielte si concentrarà sui rapresentants di gjenars musicâi che a cumbinin plui elements di interès, che a van dal virtuosisim esecutîf ae origjinalitât dai tescj, de vocazion a contâ la lôr tiere, ae capacitât di cjapâ il public in ocasion des esibizions.

Alessandro Mansutti

Alessandro Mansutti

Inzegnîr e musicist jazz, baterist rafinât in stât di sunâ sedi ai concierts dal Quirinale a Rome, sedi tai piçui club di provincie; la personalitât di chest zovin musicist si pues meti in struc cuntune frase: tal jazz, come ancje te vite, sbaliâ ritmi al pues deventâ un at creatîf.
Claudia Grimaz

Claudia Grimaz

La vôs tant che strument di une passion che e dure di dute une vite. Teatri e musiche a contat cu lis espressions artistichis plui impuartantis de nestre epoche e une formazion une vore salde le àn puartade a jessi une des cjantantis e interpretis di musiche popolâr e culte plui ricercjadis a nivel internazionâl.
Dek Ill Ceesa

Dek Ill Ceesa

Dai prâts de Cjargne ai palcs dal hip hop metropolitan, il Dek nol à mai lassât di contâ de sô int e lis traversiis de sô tiere di origjin, cuntune scletece e une fuarce che a restin unichis. Storiis di paîs deventadis poesie di strade, dulà che ducj i zovins a puedin ricognossisi.
Elsa Martin

Elsa Martin

La carateristiche principâl di cheste zovine cjantante e je chê di pandi, cu la scletece de sô vôs, une apartignince totâl al mont de art, dedicantsi anime e cuarp. Une particolaritât che tancj musiciscj di alt nivel a sintin, adun cuntun public atent, preseant dute la sô profonditât.
Rudy Citossi

Rudy Citossi

Inventôr di storiis peadis al mont che al sa di sals de Basse furlane, storiis cussì incredibilis di someâ veris. Chest zovin e atent osservadôr de realtât che i sta dulintor al rive a imbombî i tescj des sôs cjançons cu la essence profonde de gjenerazion dai furlans de so etât, e a trasformâle, cun ironie e inzen, intune materie leterarie inedite.

laipnessless.blogspot.com

Seconde serie – Arts visivis

La seconde serie e je dedicade ai protagoniscj de creativitât in lenghe furlane tal ambit des arts visivis. A son zovins ilustradôrs, esperts di grafiche cul computer, creatôrs di fumets, fotografs, scultôrs, artiscj a ducj i efiets.

Alice Durigatto

Alice Durigatto

Fotografe
A son cierts moments dulà che i moviments dai cuarps e lis espressions de muse a fevelin un lengaç che dome la fotografie e rive a cjapâ. Il sens de ricercje di Alice al sta juste in chest, e chi al è ancje l’obietîf dal so lavôr tal mieç de int intun conciert o intune altre manifestazion de sô tiere. Une ocasion di cognossince e di curiositât tal mont che i sta intor.

www.alicedurigatto.it

Carin Marzaro

Carin Marzaro

Ilustradore
E je une dissegnadore e une grafiche cuntun segn carateristic; e colabore cun gjornâi e e invente ilustrazions, cuviertinis dai discs e grafichis par grups musicâi, events e festivals. Tal stes timp e sune ancje la ghitare bas eletriche cun perizie e maestrie, e e cjape sù un mont intîr di riferiments che a deventin imagjins simbolichis e significativis dal mont furlan di vuê.

carinmarzaro.com

Edi Carrer

Edi Carrer

Scultôr
Inventôr di formis e di sugjestions che a vegnin de fuarce des sôs visions, risultât di une sedimentazion lente di esperiencis e storiis vivudis. Dal aspiet salvadi e naturâl des antighis gjavis, la piere che lui al lavore e pues deventâ cualsisei robe. E podarà jessi une astronâf aliene che e devente un bucrani, o une fantasime de infanzie pierdude che e torne a vivi intun piçul pâr di scarputis di marmul blanc, o ancje…

www.facebook.com/pg/edicarrer.visualartist

Luca Malisan

Luca Malisan

Fumetist
Al rive a inventâ monts intîrs cu la bielece des sôs taulis e cu la maestrie de grafiche al computer. A son lûcs che a vegnin di altris timps e di gjeografiis imagjinariis, però familiârs par chei che ju cjalin. Cheste e je une carateristiche dai lavôrs di Luca che, insiemi cu la sô scuadre, al puarte i letôrs in paîs lontans e di fantasie, dulà che o podìn ricognossi il profîl des monts, lis architeturis severis dai cjistiei e lis sfumaduris dai lâts dal so Friûl.

www.malisan.it

Michele Bazzana

Michele Bazzana

Artist visîf
Il colôr smamît o il polvar fin a son passaçs di une azion finide; a son il rest di une operazion che nol determine une funzion. Achì e tache la ricercje di Michele, ripuartant chescj ecès in struturis, fotografiis o performances che a puartin viers une spiete, che pal plui si conclût intun nûl di polvar o di pixel. I siei lavôrs a son un banc di prove dulà che si met in discussion la potenzialitât de machine. Il plui des voltis al è duncje l’erôr, la variabil, la prove, che a deventin la costante uniche dal so lavôr.

Tierce serie – Arts performativis

La tierce serie e je dedicade ai protagoniscj des arts performativis: teatri, danze contemporanie, performances, arts dal circ e tra chestis in particolâr i zûcs di manipolazion. A son artiscj che a crein spetacui cu la vôs, cui moviments dal cuarp, che a doprin i struments dal circ, che a fasin spetacui di strade.

Aida Talliente

Aida Talliente

Atore e regjiste
Prontâ un spetacul di teatri nol è dome un lavôr inteletuâl ma e covente ancje une preparazion fisiche. Aida lu à imparât in chescj agns midiant dal so lavôr costant di racuelte ator pal mont di storiis che no àn vôs, scognossudis o dismenteadis. A son storiis di oms e di feminis che a segnin il so percors di ricercje teatrâl, intim e personâl. Ce che al ven puartât ae atenzion dal public a son lis peraulis, il movisi e il cjalâ dai protagoniscj, adun cun dute la lôr profonde umanitât.

www.aidatalliente.it

Anna Gubiani

Anna Gubiani

Dramaturg
Cuntun voli di simpri critic e une esperience decenâl di consulence artistiche, Anna e je simpri daûr a cirî la cualitât e il perfezionament di tescj, spetacui e programs teatrâi. Cheste ativitât le puarte indenant sedi dentri dal sisteme dai teatris stabii todescs, sedi in contescj plui specifics tant che la dramaturgjie furlane. Il so lavôr si fonde sul cjalâ cun atenzion i mecanisims umans: une risorse cuasi infinide inte creazion di ogni lengaç artistic dal dì di vuê.

www.matearium.it

Davide Perissutti

Davide Perissutti

Artist di circ
Dôs a son lis naturis di Davide: une profonde e riflessive, graciis ae sô lauree in filosofie, e une plui lizere e creative, che si coleghe cul mont da la art. Al à imparât di bessôl la tecniche dal ecuilibrisim e de manipolazion dai ogjets, e al è stât un dai pionîrs di cheste art intal mont furlan, dulà che al è stât bon di ripuartâ e di meti in vore dut ce che al à imparât tes scuelis ator pal mont. Il so al è un vêr lavôr di artesan, dome che invezit dai materiâi al dopre i cuarps e i moviments di acrobats e di gaugars.

www.circoallincirca.it

Federico Scridel

Federico Scridel

Atôr
Il talent comic al è un talent naturâl e gjenetic, no si pues imparâlu cu la tecniche. Chest al è ce che Federico al à imparât fasint la academie di teatri. Achì al à podût perfezionâ la sô capacitât naturâl di jentrâ in sintonie cul public che al à denant, massime cui fruts. Al è impegnât cun produzions indipendentis, ma tal stes timp nol mole di fâ cors di teatri cun fruts di scuelis elementâr e mediis: cun lôr al dopre la lenghe furlane in maniere creative, divertente e sorprendente.

www.facebook.com/ScridelFederico/

Martina Tavano

Martina Tavano

Balarine e coreografe
Cuant che la art e je une passion che ti cjape dal dut e la musiche la sô incarnazion plui vere, il bal al devente une urgjence di espression, une reson di vite. Al è li che il cuarp al devente strument musicâl di ricercje, di sperimentazion, di studi. E cussì, balâ al è une perlustrazion infinide tra gjenars, contaminazions, lengaçs, dissiplinis. Martina e je une balarine, performer e insegnante.

COLABORADÔRS

ARLeF

Fondo Audiovisivo FVG

Regione Autonoma Friuli Venezia Giulia

GRUP DI LAVÔR

Regjie
Dorino Minigutti

Autôrs dal copion
Dorino Minigutti, Giorgio Cantoni

Ricercjis
Giorgio Cantoni

Diretore de fotografie
Debora Vrizzi

Assistent aes ripresis
Francesco Snidero

Fonic
Francesco Morosini, Havir Gergolet, Marco Cecotto

Montaç
Andrea Guarascio

Assistents al montaç
Lorenzo Fabbro, Luca Fornasiero

Fotografe di sene
Rebecca Colle

Musichis
AAVV

Direzion di produzion
Gabriella Ziraldo

Assistente di produzion
Anna Di Toma

Web
Remigio Guadagnini / Altreforme

Social web
Elena Buzzinelli, Sergio Floriani